برطانوی حکومت کی قرآن نذر آتش کیے جانے کی مذمت

برطانوی حکومت نے قرآن کو نذر آتش کیے جانے کے واقعے کی مذمت کرتے ہوئے مسلمان کمیونٹی کو یقین دلایا ہے کہ اس ملک میں ان کی مذہبی آزادی اور عبادات کی ادائیگی کو ہر ممکن تحفظ فراہم کیا جائے گا۔

یہ بات ایف سی او میں ساؤتھ ایشیا کے وزیر الیسٹر برٹ نے ایسوسی ایشن آف پاکستانی لائرز کے ایک خط کے جواب میں کہی۔  تنظیم نے وزیراعظم ڈیوڈ کیمرون  کو اپنے ایک خط  میں برٹش نیشنل پارٹی کے کارکن سیون اونز کے قرآن نذر آتش کیےجانے کےعمل کی شدید الفاظ میں مذمت کی تھی۔

اے پی ایل نےپبلک آرڈر ایکٹ کی دفعہ 29 کی خلاف ورزی پر مذکورہ شخص کی گرفتاری کے بعد اس سال اپریل میں رہائی کو ناقابل قبول قرار دیا۔

تنظیم کے چئیر بیرسٹر امجد ملک نے کہا کہ ویڈیو میں واضح طور پر اس شحص کو یہ قبیح فعل کرتے دیکھا جا سکتا ہے جو اس کے خلاف مقدمے کے لیے کافی ہے جو اس سوسائٹی کا امن خراب کرنے کے درپے ہیں۔

مسٹر ملک کے خط کے جواب میں السٹر برٹ نے لکھا کہ برطانوی حکومت نفرت اور منافرت پھیلانے والے ایسے تمام عمل کی بھرپور انداز میں مذمت کرتی ہے۔ ہر قسم کے دہشت گردوں کے لیے سب سے بڑا چیلنج یہی ہے کہ مختلف مذاہب کے ماننے والوں کے درمیان ہم آہنگی کو کیسے ختم کیا جائے۔ حکومت کی ترجیح یہی ہے کہ ملک میں تمام مذاہب کے ماننے والوں کو بلا رکاوٹ اپنےعقائد پر عمل کرنے کی مکمل آزادی حاصل ہو۔

تنظیم نے اپنے دفتر میں پاکستان میں اپنی پیشہ وارانہ ذمہ داریوں کی انجام دہی کے دوران قتل کیے جانے والے صحافیوں کے لیے تعزیتی ریفرنس میں ولی خان بابر ، سلیم شہزاد اور دیگر کے لیے فاتحہ خوانی بھی کی ۔