جعل ساز ٹورآپریٹرز سے ہوشیار رہیں: اے بی ایچ

ایسوسی ایشن آف برٹش حجاج نے فریضہ حج ادا کرنے والے برٹش عازمین حج کو خبر دار کیا ہے کہ وہ ٹورآپریٹر کے انتخاب اور حج پیکج کے لیے بکنگ کرواتے وقت انتہائی احتیاط کا مظاہرہ کریں۔

تنظیم کی طرف سے جاری ایک بیان میں کہا گیاکہ حج و عمرہ انڈسٹری میں اچھے اور نیک لوگوں کے ساتھ دھوکے اور فریب سے لوٹنے والوں کی بھی کوئی کمی نہیں ہے۔ اس لیے متعلقہ ٹور آپریٹر کے بارے میں مکمل چھان بین کیے بغیر ان سے معاملات طے نہ کریں۔

بیان میں عازمین کو خبردار کیا گیاکہ انٹرنیٹ اور ویب سائٹ بکنگ کروانے والے متعدد افراد فراڈ کا شکار ہو کر بڑی رقوم سے ہاتھ دھو بیٹھتے ہیں اور پولیس اب بھی ایسے کئی کیسز کی انکوائری کررہی ہے۔ اس لیے عازمین حج کے لیے ضروری ہے کہ وہ متعلقہ ٹورآپریٹرز سے اس کے آفس میں جا کر ذاتی طورپر حج پیکج کے بارے میں تفصیلات معلوم کریں۔