پاک بھارت مذاکرات شروع کریں: سجاد کریم

نارتھ ویسٹ انگلینڈ سے یورپی پارلیمان کے رکن سجاد کریم نے اقوام متحدہ کی سلامتی کونسل میں پاکستان کے دو سال کے لیے عارضی نشست پر انتخاب کو خوش آئند قرار دیا ہے۔  پاکستان دو سال کے لیے بھارت کے ساتھ سلامتی کونسل میں بیٹھے گا۔

یورپی پارلیمان میں فرینڈز آف پاکستان کے چئیرمین سجاد کریم نے دونوں ممالک کو مبارکباد دیتے ہوئے کہا کہ پاکستان اور بھارت بین الاقوامی ایشوز پر بہت سے مشترکہ مفادات شیئر کرتے ہیں اور خیر سگالی کے لیے بہت کچھ کرنے کی ضرورت ہے۔ دونوں ممالک کو سلالامتی کونسل کی رکنیت ایسے وقت ملی ہے جب بھارت نے ورلڈ ٹریڈ آرگنائزیشن میں ای یو کے اسٹینڈ پر اعتراضات واپس لیے ہیں۔

انہوں نے کہا کہ پاکستان اور بھارت کے درمیان اقوام متحدہ میں حل طلب مسئلہ کشمیر  وجود ہے اور وہ دونو ں ممالک پر زور دیتے ہیں کہ وہ مذاکرات کا آغاز کریں ۔ دنیا کے امن کے لیے جنوبی ایشیا میں امن ضروری ہے اور اس سلسلے میں دونوں ممالک کو مل کر کام کرنا ہوگا۔ انہوں نے کہا کہ پاک بھارت اقتصادی تعلقات میں اضافے سے وسیع تر تاریخی ایشوز کوحل کرنےمیں مدد ملے گی۔