اولمپکس کے ٹکٹوں کا ڈرامہ

حکومت نے لندن 2012 گیمز کے ٹکٹس خریدنے پر سات لاکھ پونڈ خرچ کیے ہیں  جبکہ اس کے مقابلے میں ہزاروں شائیقین کو افتتاحی اور اختتامی تقاریب ، سائیکلنگ،ایتھلیٹس اور دیگر ایونٹس کے ٹکٹس کے تیزی سے فروخت ہونے کے سبب نہیں مل سکے ہیں۔

ڈپارٹمنٹ فار کلچر، میڈیا اینڈ اسپورٹس نے آٹھ ہزار آٹھ سو پندرہ ٹکٹس پر جن میں افتتاحی تقریب کے 213 ٹکٹس بھی شامل ہیں ،ایک  لاکھ 94 ہزار پانچ سو پچیس پونڈ خرچ کیے ہیں جس میں افتتاحی تقریب کے 41 انتہائی مہنگے ٹکٹس بھی شامل ہیں جن کی قیمت دو ہزار بارہ پونڈ ہے جبکہ اختتامی تقریب کے 143 ٹکٹس کے لیے 71 ہزار چار سو نوے پونڈ ادا کیے گئے ہیں۔

دوسری طرف ہزاروں افراد ٹکٹ نہ ملنے پر ناخوش ہیں۔ ایک اعشاریہ نو ملین افراد کے دو تہائی  یعنی ایک اعشاریہ دو ملین افراد جنہوں نے پہلے ہفتے میں اپلائی کیا وہ خالی ہاتھ رہ گئےجبکہ صرف سترہ ہزار ہی ٹکٹ حاصل کرنے میں کامیاب ہوئے ہیں۔

ڈی سی ایم ایس  کے ترجمان نے کہا کہ اولمپکس اور پیرا اولمپکس کی میزبانی کا موقع کئی سالوں کے بعد ملا ہے  اور اس کے ذریعے ہمیں برطانیہ کی اچھی چیزیں دوسروں کو دکھانے کا موقع ملے گا۔ تاہم سول سرونٹس کے لیے کسی قسم کے فری ٹکٹس نہیں ہیں۔