سندھ سیلاب زدگان، امپیریل کالج کے طلباء کی فنڈ ریزنگ

پاکستان میں سیلاب زدگان کی مشکلات ختم نہیں ہوئیں اور سردیوں کے موسم میں لاکھوں متاثرین ہماری طرف امید بھری نظروں سے دیکھ رہے ہیں۔

یہ بات ایمپریل کالج کی پاکستان سوسائٹی کے عہدیداران نے سندھ سیلاب زدگان کی امداد کے لیے ’شام’ کے عنوان سے ایک فنڈ ریزنگ ڈنر سے خطاب میں کہی۔ 

سوسائٹی کی صدر مریم یاسین نے کہا کہ گزشتہ سال آئے سیلاب کے مقابلے میں اس سال سیلاب نے زیادہ تباہی مچائی ہے اور سندھ کے تقریبا بائیس اضلاع میں املاک اور کھڑی فصلوں کو نقصان پہنچایا ہے۔ اوپر سے سردیاں بھی سرپر  ہیں۔ ہماری کوشش چھوٹی ہی سہی مگر ہم سب کی ذمہ داری ہے کہ اس وقت میں جو کچھ کر سکتے ہیں کریں۔ انہوں نے کہا کہ سوسائٹی ہر سال نومبر  میں ’شام’ کے نام سے محفل موسیقی کا اہتمام کرتی ہے اور اس مرتبہ اس سے حاصل ہونےوالی چیرٹی کی رقم ہم جیمس کین فاؤنڈیشن کودیں گے۔

فیضان ارشد نے کہا کہ اس وقت کہ جب میڈیا کی توجہ بھی اور ایشوز پر ہے تو ایسے میں اورسیز کمیونٹی کا فرض ہے کہ وہ انٹرنیشنل لیول پر اس ایشو کو زندہ رکھے اور ان متاثرین کی مشکلات سے آگاہی فراہم کرے۔ سیلاب متاثرین کے لیے مزید کسی بیرونی انتظار کی بجائے  اورسیز کمیونٹی آگے بڑھے۔ انہوں نے کہا کہ اسٹوڈنس کمیونٹی نے اس سے قبل  بھی ہر مشکل گھڑی میں اول دستے کا کردار ادا کیا ہے اور اب بھی یہاں پڑھنے والے طالب علم اس فرض کو نبھانے میں پیش پیش ہیں۔

نعم رضا نے کہا کہ اس وقت میں ایک دوسرے پر تنقید کرنے کی بجائے مل جل کر ہاتھ بٹائیں اورہم اسٹوڈنٹس اپنی حیثیت کے مطابق اپنے سیلاب متاثرہ بھائی بہنوں کی مدد کررہے ہیں۔ ہیمراسمتھ ٹاؤن ہال میں ہونے والے اس فنڈ ریزنگ ڈنر میں کنگز کالج ، یو سی ایل ،  ایل ایس سی،سٹی،  آکسفورڈ، ریڈنگ  سمیت دیگر یونی ورسیٹیز کی پاکستان سوسائٹیز کے ممبران، عہدیداران  اور طالب علموں کی بڑی تعداد نے شرکت کی ۔ ایونٹ کے دوران جمع کی گئی رقم  جیمس کین فاؤنڈیشن کی سندھ کے سیلاب متاثرین کے پروگرام کو جائے گی۔ 

تقریب کی میزبانی مسی ڈی نے کی جبکہ ایمپریل کالج کی بھنگرا ٹیم کے علاوہ عمر، راف، مدیحہ، ساؤتھ ہال بوائز، زوہیر اور ان کے گروپ نے گیت اور رقص پیش کیے۔