میمو اسکینڈل: عاصمہ کی معذرت

سپریم کورٹ بار ایسویسی ایشن کی سابق صدر اور میمو کیس میں حسین حقانی کی وکیل عاصمہ جہانگیر نے اپنے موکل کی مزید وکالت کرنے سے معذرت کرلی ہے۔

ایک پرائیوٹ ٹی وی چینل سے بات کرتے ہوئےانہوں نے کہا کہ وہ سپریم کورٹ کی جانب سے میمو اسکینڈل کی تحقیقات کے لیے تشکیل دئیے گئے کمیشن پر بالکل اعتبار نہیں کرتیں۔انہوں نے مبینہ طور پر سپریم کورٹ کے ججز  کو اسٹبلشمنٹ کے زیر اثر  ہونے کا الزام عائد کیا۔

عاصمہ نے مزید کہاکہ حسین حقانی نے اس اندیشے کا اظہار کیا تھا کہ طاقت ور خفیہ ایجنسی انہیں اپنی مرضی کا بیان دینے پر مجبور کرسکتی ہے اور اسی وجہ سے وہ وزیراعظم گیلانی کی رہائش گاہ پر ٹھہرے ہوئے ہیں۔

تاہم انہوں نے کہا کہ میمو گیٹ اسکینڈل پر سپریم کورٹ کا فیصلہ اسٹیبلشمنٹ کی فتح ہے اور قانون اس ملک کو ایک سکیورٹی اسٹیٹ بنانے کے لیے استعمال کیا جارہا ہے۔