انوج بدوے کے والدین کا پارلیمان کا دورہ

برطانیہ میں باکسنگ ڈے پر  قتل ہونے والے انڈین طالب علم  انوج بدوے کے والدین نے کہا ہے کہ انہوں نے اپنے بیٹے کے اچھے مستقبل کے لیے اس کو پڑھنے کے لیے انگلینڈ بھیجا تھا۔

پارلیمنٹ کی عمارت کے سامنے ہوم افئیرز سیلیکٹ کمیٹی کے چئیرمین کیتھ واز ایم پی سے ملاقات کے دوران مقتول کے والد سبھاش بدوے نے اپنے بیٹے کے لیے انصاف کا مطالبہ کیا ۔ بدھ کو برطانیہ پہنچنے کے بعد  سبھاش، ان کی اہلیہ یوگنی اور سالے راکیشن سوناوی نے کیتھ واز سے تقریبا 35 منٹ تک ملاقات کی۔ انوج کے والدین جمعہ کو اس کی میت کے ہمراہ انڈیاروانہ ہوں گے۔ انوج کے قتل کے جرم میں پولیس نے ایک بیس سالہ کیارن اسٹیپلیٹن کو گرفتار کیا ہے۔

مسٹر بدوے کا کہنا تھا کہ انہیں اپنے بیٹے کے بچھڑنے کا بڑا دکھ ہے اور ایک والد کے طور پر وہ نہیں چاہیں گے کہ ایسا واقعہ پھرکسی کے ساتھ پیش آئے ۔ ’میں یہاں اپنے بیٹے کے لیے انصاف کا مطالبہ کرتا ہں اور جو طالب علم یہاں پڑھنے کے لیے آئے ہیں وہ یہاں پڑھیں اور واپس جائیں’۔

’میرا بیٹا نہ صرف انڈیا بلکہ دنیا کے لیے ایک اثاثہ تھا۔وہ بہت راست گو ،منظم ، نرم خو اور انسان دوست تھا’۔

مسٹر کیتھ واز نے کہا کہ انکے کئ پارلیمانی ساتھیوں نے ان سے رابطہ کرکے اس واقعہ پر اپنے دکھ اور تعزیت کا اظہار کیا ہے۔ یہ موقع ہے کہ وہ براہ راست انوج کے والدین تک اپنے جذبات پہنچائیں۔انوج اوران کی فیملی کی تکریم کے لیے ایک فنڈ قائم کرنے کی صلاح بھی دی گئی ہے۔

انہوں نے انوج کے والدین کی جانب سے فیس بک انتظامیہ سے انوج کا بیج کھولنے کی بھی استدعا کی اوراس کیس کی قانونی کارروائی مکمل ہونے کے بعد واقعے کے محرکات اورحقائق منظر عام پر لانے کا اعادہ کیا۔