بابر احمد کیس: بی بی سی نےمقدمہ جیت لیا

بی بی سی نے  حکومت کے خلاف دہشت گردی کے شبہ میں قید ایک برطانوی مسلمان بابر احمد کا انٹرویو فلم بند کرنے اور اس کو نشر کرنے کی اجازت دینے سے انکار کا مقدمہ جیت لیا ہے جنہیں گزشتہ سات سال سے بغیر کسی ٹرائل کے قید میں رکھا گیا ہے۔

دو ججز نے کہا کہ بابر احمد کا کیس ’انتہائی غیر معمولی’ ہے۔ ماڈرن ہسٹری میں بغیر کسی ٹرائل کے اتنے عرصے تک قید میں رکھے جانے والے بابر واحد برطانوی ہیں۔

ججز نےاپنے فیصلے میں  کہا کہ غیر معمولی حقائق کو جواز بنا کر جسٹس سیکریٹری کین کلارک کا اس کے انٹرویو  کی اجازت دینے سے مسلسل انکار آزادی اظہار میں ایک طرح کی ’ناموزوں مداخلت’ ہے جس کو  مسترد کیا جانا چاہیے۔

یہ فیصلہ بی بی سی اور ہوم آفس نامہ نگار ڈومینک کاسکیانی  کی فتح خیال کیا جارہا ہے ۔

حکومتی وکلاء نے اشارہ دیا ہے کہ اس فیصلے کے خلاف کوئی اپیل نہیں کی جائے گی اور فریقین اس انٹرویو کو یقینی بنانے کے امور پر بات چیت کریں گے۔

37 سالہ برطانوی مسلمان بابر احمد متنازعہ حوالگی کے قانون کےتحت خود کو امریکہ کے حوالے کیے جانے کے خلاف جنگ لڑ رہے ہیں جہاں وہ مبینہ طور پر چیچن اور افغان مزاحمت کاروں کےلیے انٹرنیٹ کے ذریعےفنڈ جمع کرنے کے الزام میں مطلوب ہیں۔

انہیں ووکیسٹرشائر کے ایک خصوصی یونٹ میں قید رکھا گیا ہے  اور وہ یورپین کورٹ کے فیصلے کے منتظر ہیں کہ آیا انہیں امریکہ کے حوالے کیا جانا چاہیے یا نہیں۔ عدالت کو بتایا گیا کہ اس سلسلے میں فیصلے پر ’ترجیحی بنیادوں’ پر کام کیا جارہا ہے۔