یونی ورسٹی داخلوں کی درخواستوں میں نو فیصد کمی

برطانوی طلباء کی جانب سے یونی ورسٹی میں داخلوں کی درخواستوں میں تقریبا نو فیصد کی کمی آئی ہے اور اس کمی کی وجہ ٹیوشن فیس میں اضافے کو قرار دیا جارہا ہے۔

اوکاس کی جانب سے جاری کردہ اعداد وشمار کی روشنی میں طلباء کی جانب سے کورسز میں رجسٹریشن میں کمی سے ان کی تعداد پانچ لاکھ سے چار لاکھ پر آن پہنچی یعنی ان میں آٹھ اعشاریہ سات فیصد کی کمی ہوئی ہے۔

گزشتہ سال کے مقابلے میں رواں سال برطانوی اور اورسیز اسٹوڈنٹس کی جانب سے داخلوں کی درخواستوں میں سات اعشاریہ چار فیصد کی کمی آئی ہے۔

اس سال کے آخر تک برطانوی یونیورسٹیوں میں ٹیوشن فیس میں اضافہ ہوجائے گا  اور ایک طالب علم کو ٹیوشن فیس کی مد میں نو ہزار پونڈ ادا کرنے ہوں گے جبکہاورسیز اسٹوڈنٹس سے اس سے کہیں زیادہ ٹیوشن فیس چارج کی جاتی ہے۔

امریکہ کے مقابلے میں برطانیہ میں ٹیوشن فیس اب بھی اتنی زیادہ نہیں تاہم  گزشتہ ماہ طلباء نے ٹیوشن فیس میں اضافے کے خلاف بھرپور مظاہرے کیے اور ان کا کہنا تھا کہ فیسوں میں اضافہ کرکےغریب طلباء سے پڑھنے کا حق چھینا جارہا ہے۔

سسکس یونی ورسٹی کے چانسلر پروفیسر مائیکل فاردنگ نے داخلے کی درخواستوں میں کمی پر تشویش کا اظہار کرتے ہوئے حکومت سے اس سلسلے میں ٹھوس قدم اٹھانے پر زور دیا ہے۔