ہیتھرو: ’عملے کی کمی’، مسافروں کا رش

اطلاعات کے مطابق ہیتھرو ائیرپورٹ پر’سٹاف کی کمی’ کے سبب چھٹیاں گزار کرآنے والوں کو  امیگریشن سے گزرنے کے لیے کئی گھنٹوں کا انتظار کرنا پڑ رہا ہے۔ یوکے بارڈر ایجنسی نے اس صورت حال کے لیے برٹش ائیر ویز کو ذمہ دار ٹھہرایا ہے کہ اس کی جانب سے اسٹاف میں کمی کے سبب جہاز سے اترنے والے مسافروں کی لمبی قطاریں  امیگریشن سے گزرنے کی منتظر ہیں۔

حکام نے اس خدشے کا بھی اظہار کیا ہے کہ ہیتھرو پر رش کو کم کرنے کے لیے فلائٹس کو دیگر برطانوی ائیرپورٹس کی طرف بھی  موڑا جا سکتا ہے۔  

ہیتھرو پر  گزشتہ روز ٹرمینل فایئو پر مسافروں کا انتہائی رش دیکھا گیا جو برٹش ائیر ویز کا مین مرکز ہے جہاں گزشتہ رات سےمسافروں کی لمبی قطاریں لگی ہیں۔

برٹش ائیر ویزکے ترجمان کا کہنا ہے کہ اس ایشو پر  ہیتھرو ائیر پورٹ اور یوکے بارڈر ایجنسی  سے بات کرکےٹرمینل فایئو پر اس قدر رش کی اصل وجوہات جاننے کی کوشش کی جارہی ہے۔

’ہم اپنے صارفین کی رہنمائی اور مدد کے لیے ہر ممکن اقدام اٹھارہے ہیں اور اس ایشو سے متاثرہ مسافروں سے معذرت خواہ ہیں۔'

دوسری طرف ایجنسی نے اس بات کو بھی تسلیم کیا ہے کہ گزشتہ روز  اور آج مسافروں کی غیر معمولی تعداد ہیتھرو سے گزری۔ انہوں نے اس بات کا بھی اشارہ دیا کہ اس رش پر قابو پانے کے لیے اضافی وسائل استعمال کیے جا سکتے ہیں۔